साहिल

bachpan ki yaadein ta-umr humare saath rehti hain... wo sara sara din befikri se khelna, na koi chinta na koi fikr, bas khana, peena, sona aur mast rehna... tamam duniyavi rishton se pare wo nishchhal, nishkapat vaatsalya sab par lutana aur apni ek muskan ke badle har kisi se wo dher sara pyar pana... sach insan ki zindagi ke wo sabse khoobsoorat lamhe hote hain par unki ehmiyat humen bade hokar hi pata chalti hai... bachpan me baarish ki ek boond girte hi kaise man machal uthta tha aur bas ghar me dhundhne lagte the raddi kagaz ka ek tukda... ya kabhi purani kisi copy se panna phaad kar jut jaate the bas kagaz ki ek nanhi si kashti banane aur ghar ke bahar bhare hue baarish ke paani me use taira kar der tak taakte rehte the ki kidhar ja rahi hai humari naav... kabhi aadhe raste ulat kar pani me doob jaati to man achanak udaas ho jata aur raah chalta koi use seedha kar ke phir se taira deta us maile kuchaile se pani me to man ek baar phir khil uthta... aah! wo masoom bachpan aur wo seedha-saral baalman, aaj socho to hansi aati hai... kya kabhi aapne bachpan me kaagaz ki naav banaate samay ye socha tha ki ek bemani se raddi kagaz ko aap koi maane de rahe hain... humne bhi nahi socha tha... par gulzar sa'ab ki is nazm ne humen aaj us kagaz ki naav ko ek naye nazariye se dekhne aur samajhne ka mauka diya...